قصة ‏العشق الممنوع

zistness

01:00

0 تعليقات

شاركه غرد جوجل+

قصة ‏العشق الممنوع - الجزء 1

سميتي هبة 20 سنة ،بلا مانقوليكم منين انا. لمهم

عندي هو نحكي ليكم قصتي و الله يخليكم ماتاخدوش علي حكم خاطئ اولا نضرة خايبة حتا تسمعو لي عندي. 

انا الوحيدة عند ماما و بابا لي يالاه خدا تقاعد ديالو من الوكالة المستقلة للماء و الكهرباء ومن تما مابقيناش كنشوفوه بزاف فدار لا انا لا ماما.. ولات كتوصلنا خبارو بلي ولا غارق ف الشراب و ماكيسحاش منو .. علأقل الخدمة كانت دايرة فيه خير كبير أما دبا ضاع.. وتبع الشراب و البنات على برا.. انا الصراحة ماعمرني حسيت بحنان الاب،ديما كانت واحد الفجوة بيناتنا .. عمري عقلت عليه شي نهار جلس جمع معايا ولا حسسني اني ف حاجة ليه ..والو ! وحتا انا بيني وبينكم ماكنتش حاسة بلي عندي أب. ديما كنت كنعول على ماما فأي حاجة.. الحصول غي الله يسمح ليه والله يشوف من حالنا كاملين...

قصة ‏العشق الممنوع - الجزء 2

نعاود ليكم على راسي شوية.. انا تانقرا ف الجامعة.. وكنقرا مزيان حيت قرايتي هي المتنفس ديالي. كتخليني نعوض اي حاجة تحرمت منها فوسط الكتوبة.. اللهم نغرق وسط الوراق ونسى همي ولا نبقا نمرض راسي..

انا ماشي زوينة نهائيا وماكنلبسش شي حاجة تحمر الوجه .. مامتبعاش الموضة بحالي بحال كاع البنات.. كتلقاني دايرة حلوة الموسم ف لبسي.. سروال حمر ،تريكو صفر ،فولار مخلطين فيه لوانات باهتين ،شعر ماكنمشطوش غي من حمام لحمام،وجهي ذابل بزاف..عندي جيوب تحت عيني بكترة السهير... زعمة لاشافتني مرا حاملة تطيح بنادم هههه ولكن نقطة القوة ديالي هو لساني ، كنقولها و كنعاودها ليكم البنات ... متغروش و يحساب ليكم الزين هو كلشي فهاد الزمان لالالا راكم غالطين وبزاف .. كلشي على حلاوة اللسان.. 

انا كنعرف نهضر مزيان وكنقاد الخواطر لكلشي.. وخا نكون مضلومة كنسمح ف حقي بغرض نبقا محافضة على علاقاتي بالناس لي قراب لي.. هادشي ماشي ضعف مني ولكن غي باش مانخسروش مع الناس حيت لاجينا نحكرو على ابسط حاجة تاعلاقة ماغادي تبقا تجمعنا بالاخر..

قصة ‏العشق الممنوع - الجزء 3

جا وقت ديال سطاجات وكان علي نقلب على سطاج فين ماكان باش نكمل بروجي ديالي.. اخيرا لقيتو فواحد الشركة صغيرة بدون ذكر الاسم .. خدامين فها 2 ناس راجل كبير ومراتو.. استقبلوني وطمعت ف شي بوسط معاهم ف داك بيرو.. باش نهز راسي ونتحمل حتا انا المسؤولية.. ايوا داز داك الشهر لول مزيان تعلمت فيه الخدمة على حقها وطريقها حيت عقلي خفيف بزاف وحيت عندي الرغبة نتعلم كتر وكتر.. داكشي علاش مرات مول الشركة سلمات لي الشغل و جلسات تقابل ولادها فدار.. 

نعاود ليكم شوية علا هاد العائلة.. متكونة من 4 ديال افراد و هما ناس ملتزمين ف الدين و كيلبسو اللباس الشرعي..

قصة ‏العشق الممنوع - الجزء 4

دازو ايام و ايام وليت تنخدم بزاف فبيرو ديال مول الشركة وولينا ماكنتفرقوش ..الصراحة حسيت اني اخيرا لقيت الحنان ديال الاب لي عمري حسيتو ولي كنت شحال كنقلب عليه .. حتا داك السيد مسكين ديما داير لي خاطري و ماكيخسرش لي وكيتعامل معايا مزيان .. مانكدبش عليكم ولا عاجبني الحال بزاف فالخدمة معاه.. وحتا هو ولى يسول في ديما ومعمر علي وقتي .. كنهضرو فواتسب .. ف تلفون .. ف مساجات .. مابقيناش كنقدرو نستغناو على بعضياتنا ..تا جا النهار لي ...

قصة ‏العشق الممنوع - الجزء 5

تا جا النهار لي صافي وليت كنحس اني وليت كنبغيه كرجل ماشي كأب وحتا هو اعتارف لي بالحب ديالو وبلي مايقدرش يدوز شي نهار بلا مايشوفني أولا يسمع صوتي فيه ...هو ف سن ديالو 45 عام وانا 20 عام... اياااه 25 عام ديال الفرق بيناتنا ولكن حبنا كان قوى من اي حسابات اخرى.. 

ولينا تانخرجو يوميا ..كل مرة ف قنت كنا كنفوتو المدينة.. كنخرجو للنواحي .. ديما جادارميا موقفينا كنت كندير معاه كلشي .. مابقيتش كتهمني شي حاجة حيت حبنا قوي ... و جا الوقت لي مشا عند مرتو وطلب منها الطلاق...

قصة ‏العشق الممنوع - الجزء 6

شنو فنضركم لي تيخلي الراجل يفكر ف مرا اخرا من غير مرتو.. اكيد ديفو من المرا علا حساب ماقالي نساتو و هملاتو ومعقدة وماكتلبسش له وماكتزوقش له ..مابقاتش كتحسسو برجولة ديالو .. ولات مدياها غي فالاولاد.. بحال هو ماكينش.. اذن انا لقا عندي داكشي لي كان محروم منو... ماتعاتبونيش وماتعايرونيش حيت حتا انا كنت تايهة فهاد الدنيا و بلي هو لي خرجني من هاد المتاهة..كيفاش نفرط فيه؟مانقدرش،.

اخر مرة شفتو يومين دبا ..كان مبقاش كيجاوبنيش علأ تلفوناتي واضطريت نتخفا ف لباس المنقبات انا وصاحبتي ونمشيو حدا دارو ونديرو بريوسنا كنبيعو البغرير غي باش نعرف شنو واقع فدارو وشكون لي تيدخل وتايخرج .. 

داكشي لي كان نيت.. وبانت لي الدار عندو عامرة.. اكيد عائلاتهم بغات تصلح بيناتهم.. هادا علاش ماكانش كيجاوبني.. فقررت...

قصة ‏العشق الممنوع - الجزء 7 والاخيير

فقررت اني نرجع لدارنا و نبقا نعيط تا يجاوبني.. واخيرا جاوبني تال 1 ديال ليل وبقيت كنعاتبو علآ غبرة ديالو .. مهم بردت فيه هوايشي وطلب انو يشوفني ديك الساع ..وافقت فديك الليلة وخرجت عندو تا نعسات ماما اما بابا بفففف فينهو ؟عالم الله!!

طلعت طونوبيل بقيت كنضرب فيه و نغوت وهو كيحاول يهدن في .. جرني عندو ..عنقني وباسني .. وتهدنت .. صافي نسيت .. والسبب ديال عدم الرد على اتصالاتي هو انو كانو دايرين بيه العائلة.. وتايحاولو يقنعوه يتراجع على قرارو..

دبا البنات هادي هي قصتي لي مازال ماعندها نهاية. وانا صيفطها الاخت مونية باش تحطها ف هاد جروب. قولو لي اش بان ليكم؟ بلا معيار عافاكوم.